Jos 22 | NdeIBE | STEP | UJoshuwa wamema amaRubheni, amaGadi lengxenye yesizwe sikaManase

Joshua 22

Izizwana zeMpumalanga ziphindela Ekhaya

1 UJoshuwa wamema amaRubheni, amaGadi lengxenye yesizwe sikaManase

2 wathi kubo, “Selenze konke uMosi inceku kaJehova eyakulayayo, njalo lingilalele kukho konke engililaye ngakho. 3 Okwesikhathi eside khathesi – kuze kube lamuhla – kalizange lihlamukele abafowenu kodwa lenze umsebenzi lowo uJehova uNkulunkulu wenu alinike wona.

4 Njengoba uJehova uNkulunkulu wenu wanika abafowenu ukuphumula njengokuthembisa kwakhe, buyelani emakhaya enu elizweni uMosi inceku kaJehova alinika lona ngaphetsheya kweJodani. 5 Kodwa linanzelele kakhulu ukuthi lilondoloza umlayo lomthetho uMosi inceku kaJehova alinika wona: Ukuthanda uJehova uNkulunkulu wenu, ukuhamba ezindleleni zakhe zonke, ukulalela imilayo yakhe, ukuba-mbelela kuye lokumsebenzela ngenhliziyo yenu yonke lomphefumulo wenu wonke.”

6 UJoshuwa wasebabusisa wathi kabahambe; yikho basebesiya emizini yabo.

7 Ingxenye yesizwana sakoManase uMosi wayeyinike ilizwe eBhashani, kwathi eyinye ingxenye yesizwana uJoshuwa wayeyinike indawo lapho okwakwakhele abafowabo eJodani. Kwathi uJoshuwa esethe kabahambe emakhaya, wababusisa 8 wathi, “Buyelani emakhaya enu lenotho yenu enengi – lilemihlambi emikhulu yezifuyo, lilesiliva, igolide ithusi lensimbi, lamalembu amanengi – beselisabelana labafowenu lokho elakuthumba ezitheni zenu.”

9 Ngakho amaRubheni, amaGadi lengxenye yesizwana sakoManase batshiya abako-Israyeli eShilo eseKhenani babuyela eGileyadi, ilizwe labo, ababelizuze kulandela umlayo kaJehova awethula ngoMosi.

10 Bathi sebefike eGelithothi eduzane leJodani elizweni leKhenani, amaRubheni, amaGadi lengxenye yesizwana sakoManase bakha i-alithare elikhulu eduzane leJodani.

11 Kwathi abako-Israyeli sebezwe ukuthi sebakhe i-alithare emngceleni weKhenani eGelithothi duzane leJodani eceleni le-Israyeli

12 umphakathi wonke wako-Israyeli wabuthana eShilo ukulungiselela ukulwa labo empini.

13 Ngakho abako-Israyeli bathuma uFinehasi indodana ka-Eliyazari, umphristi elizweni leGileyadi kuRubheni, uGadi lengxenye yesizwana sakoManase. 14 Waphelekezelwa yiziphathamandla ezilitshumi sisinye siyinhloko yesigaba semuli phakathi kwezinsendo zako-Israyeli.

15 Ekuyeni kwabo eGileyadi – kuRubheni loGadi lengxenye yesizwana sakoManase bathi kubo:

16 “Umphakathi wonke kaJehova uthi: ‘Kungani lephule ithemba kuNkulunkulu wako-Israyeli ngale indlela? Kungani lilahle uNkulunkulu lizakhela i-alithare njengokumhlamukela khathesi. 17 Kambe ukona kukaPhewori kakwanelanga kithi na? Kuze kube lamhla kasikazihlanzi esonweni leso, lanxa umkhuhlane wake wahlasela isizwe sikaJehova!

18 Selibalekela uJehova na? “ ‘Uma lingahlamukela uJehova lamhla, kusasa uzazondela isizwe sonke sako-Israyeli: 19 Uma umhlaba elilawo ungcolisiwe wozani emhlabeni kaJehova lapho ithabanikele likaJehova elimi khona beselisabelana umhlaba lathi. Kodwa lingahlamukeli uJehova kumbe thina ngokuzakhela i-alithare lenu, ngaphandle kwealithare likaJehova uNkulunkulu wethu.

20 Lapho u-Akhani indodana kaZera aze aziphathe ngendlela engathembekanga mayelana lezinto ezingcwelisiweyo, isijeziso kasehlelanga isizwe sonke sako-Israyeli yini? Kayisuye yedwa owafela isono sakhe.’ ”

21 Ngakho uRubheni, uGadi lengxenye yesizwe sakoManase baphendula abakhokheli bezinsendo zako-Israyeli bathi: 22 “USomandla, uNkulunkulu uJehova! USomandla uNkulunkulu uJehova! Uyazi! Njalo u-Israyeli kabe lolwazi! Uma lokhu bekuyikuhlamukela kumbe ukuqholozela uJehova, lingasisindisi lamhlanje.

23 Uma sazakhela i-alithare lethu ukwenzela ukubalekela uJehova lokunikela ngeminikelo yokutshisa leminikelo yamabele, kumbe ukunikela ngeminikelo yobudlelwano kulo, uJehova ngokwakhe kasijezise.

24 “Hatshi! Sakwenza sisesaba ukuthi kwelinye ilanga izizukulwana zenu zingathi kwezethu, ‘Lilani loJehova uNkulunkulu wako-Israyeli? 25 UJehova sewenza iJodani ibe ngumngcele phakathi kwethu lani lina maRubheni lamaGadi! Kalilasabelo kuJehova.’ Ngakho izizukulwane zenu zingenza ukuthi ezethu ziyekele ukwesaba uJehova.

26 “Yikho sathi, ‘Kasilungiseni, sakhe ialithare – kodwa hatshi eleminikelo yokutshisa kumbe imihlatshelo.’

27 Ngeyinye indlela, kuzakuba yibufakazi phakathi kwethu lani lezizukulwana ezizalandela, ukuthi sizekhonza uJehova endlini yakhe engcwele ngeminikelo yobudlelwano. Ngakho kwelakusasa izizukulwane zenu kazisoze zithi kwezethu, ‘Kalilasabelo kuJehova’

28 “Njalo sathi, ‘Bangavele batsho lokhu kithi kumbe kuzizukulwane zethu, sizaphendula sithi: Khangelani emfanekisweni we-alithare likaJehova, elakhiwa ngobaba, hatshi eleminikelo yokutshiswa lemihlatshelo, kodwa njengobufakazi phakathi kwethu lani.’

29 “Kukhatshana kithi ukuthi sihlamukele uJehova simfulathele lamhla ngokwakha ialithare leminikelo yokutshiswa, iminikelo yamabele lemihlatshelo, ngaphandle kwealithare likaJehova uNkulunkulu wethu elimi phambi kwethabanikeli lakhe.”

30 Kwathi uFinehasi umphristi labakhokheli besizwe – abakhokheli bezinsendo zako-Israyeli – sebezwe okwakutshiwo nguRubheni, uGadi loManase bathokoza. 31 UFinehasi indodana ka-Eliyazari, umphristi, wathi kuRubheni, uGadi loManase, “Lamhla siyazi ukuthi uJehova ulathi, ngenxa yokuthi kalizanga liyekele ukwethembeka phambi kukaJehova kuloludaba. Khathesi selihlenge abako-Israyeli esandleni sikaJehova.”

32 UFinehasi indodana ka-Eliyazari, umphristi, labakhokheli babuyela eKhenani bevela emhlanganweni wabo lamaGadi eGileyadi basebebika kwabako-Israyeli.

33 Bathokoza ukuzwa umbiko basebedumisa uNkulunkulu. Kabasakhulumanga njalo ngokuya empini yokubalwisa ukwenzela ukutshabalalisa ilizwe lapho amaRubheni lamaGadi ayehlala khona.

34 Njalo amaRubheni lamaGadi anika ialithare lelibizo: UBufakazi Phakathi Kwethu ukuthi uJehova unguNkulunkulu.